ممكن تسأل سيادة الرئيس:
«إشمعنى يا ريس، ترعى وتحضر افتتاح معرض أسامة كمال؟
واحنا فلاحين مصر ريقنا نشف إن سيادتك أو حتى رئيس الحكومة يرعى أو يحضر افتتاح المعرض الزراعى السنوى (صحارى)؟
هوّ يا ريس لازم الفلاحين يلبسوا (كرافتات وبدل ويحطوا برفان) ويمسكوا فى أيديهم (آى باد) عشان المسئول فى مصر يحترمهم ويعبّرهم ويسأل عليهم ويمشى فى وسطهم؟ ولّا الحكاية: علاقات عامة؟
ولّا يا ريس تكونش الزراعة حاجة عيب، وبيتكسفوا منها (زى ما كتب د. عمارة فى مقال قبل كده)؟
يا ريس أنا سافرت المغرب وتركيا وفرنسا.. حضرت معارض زراعية عندهم، (وعلى فكرة باسافر لابس بدلة من غير كرافتة) وبرضه فى إيدى (آى باد)، باتكلم إنجليزى مش بطال، وباعرف أناقش الخواجات لأنى دارس تاريخ بلدى (أم الدنيا) اللى قامت حضارتها على الزراعة، وكانت مخزن غلال الرومان، ومذكورة فى كل الأديان، بأراضيها الطيبة وخيراتها اللى كانت مغرقة العالم، وجدران المتاحف والمعابد بتحكى بالصور وبالهيروغليفى حكاية شعب وأرض، والعالم كله قرأ وكتب وشهد واعترف!!
يا ريس: فى المعارض بّره لما أقول (أنا مصرى) الناس بتوقفـنى وتسألنى: هوّ ليه دولتكم أهملت الفلاحة وانتم المفروض تأكّلوا المنطقة كلها.. عندكم الطقس المعتدل طول السنة، وعندكم الأرض بسم الله ما شاء الله، وعندكم خبرة 7 آلاف سنة فى زراعة الأرض، وعندكم 90 مليون مواطن، كلهم من أصول ريفية (مش أفندية)، وبتغنوا للفلاح من زمااان.. وكمان ربنا أعطاكم موقع جغرافى مالوش مثيل.. أوروبا فى الناحية التانية من البحر.. وأفريقيا فى ضهركم.. والعالم العربى بيستورد أكله وشربه بفلوس بتروله، وفى النهاية انتم يا مصريين بتستوردوا بـ21 مليار دولار أكل وشرب ودخان؟
إزاى وليه؟
إزاى ده بيحصل؟ وليه تقبلوا وتسكتوا على كده؟.
دى أسئلتهم يا ريس.. وأنا ماقدرش أتكلم أبداً عن بلدى خارج حدودها.. ماقدرش أتهم حكومة بلدى بأنها مقصّرة (ومش هاقول مجرمة فى حق تاريخها) مجرمة فى حق حاضرها ومستقبلها وأمنها القومى.. يا ريس ابعت حد ممن تثق فى أمانتهم يشوف عندهم الدولة حاضرة إزّاى، والإعلام كله مجند تلقائى.. يتكلّم ويُنشر ويعلن عن معارضهم السنوية، والدورية بكل محافظة.. يشوف فى أغادير.. الفنادق مليانة إزاى، مفيش أوضة فاضية.. العارضين من كل أنحاء العالم، والزوار من أوروبا والصين ومن كل أنحاء المغرب!!
فى المعرض ماتسمعش عربى قدّ ما تسمع فرنساوى وإسبانى وطليانى، ومن شرق آسيا ما تعرف صينى ولّا كورى ولّا يابانى.. والمعدات المعروضة من كل ماركة.. من الإبرة للصاروخ (زى ما بيقولوا).. والبحوث الزراعية من كل بلد مقدمة أحدث ما وصل إليه العلم فى إنتاج التقاوى والشتلات، ومن سلالات البقر والماعز والخراف، ومن أحدث معدات تحلية مياه البحر، وآخر ما وصلوا إليه فى الطاقة الشمسية لاستخراج المياه من الأعماق والتدفئة للصوب فى الشتاء.. و.. و.. إلخ.
4 أيام فى أى معرض، هتشوف رئيس الدولة والوزرا كلهم يوم الافتتاح.. وهتضحك مع رئيس الحكومة بتاعهم وهو واقف بيطبطب على بقرة (فريزيان) مربربة، وهتتفرج على مسابقة لملكة جمال النعاج، ووزير الزراعة واقف بيتصوّر معاها، ويسلّم شهادة التقدير للفلاحين الفائزين.. ومش هتشبع من المأكولات المعروضة مجاناً من الشركات للزوار، وكله تحت بند (الدعاية والإعلان)!!
فى قاعات مفتوحة هتحضر (ندوات) وتسمع من علماء وخبراء.. يعرّفوك آخر التطورات فى عالم الأسمدة والمبيدات.. وعن التوسُّع الرأسى فى الإنتاج، وكيف وصلوا إلى معدلات قياسية للعائد من المتر المكعب من الماء، ومحاضرات عن التصدير وكيفية غزو الأسواق، وعن تدريب وتأهيل العمال والمشرفين والمهندسين، وإدارة المزارع وتأهيلها والتسويق الداخلى والخارجى لمنتجاتها.. ستسمع عن دعم الفلاح هناك، وهتمصمص شفايفك لما تعرف أن البنك الفلاحى عندهم، بيروح للمربى والصياد والفلاح لباب البيت يعرض عليه تسهيلات، وقروض بدون فوايد وبفترة سماح 3 سنوات (لكل شاب)يبدأ مشروعه الصغير فى الإنتاج!!
وللشركات الفايدة بـ3% وسنتين سماح، ولا يوجد فى المغرب كلها فلاح أو مربى ماشية أو صياد مسجون أو مهدد بالسجن (عندنا 283 ألف مهدد أو هارب أو مسجون) ليه؟ لأن الدولة عندنا اتعودت من زمااان على سخرة الفلاح (من أيام ما كانت بتشترى منه القطن بالجنيه، وتصدّره بالدولار.. والفرق يدخل الميزانية عشان الحرامية)!!
الخلاصة يا ريس:
مفيش وزير زراعة من 3 سنين راح يفتح ولّا حتى يزور معرض (صحارى).. الوزير عادل البلتاجى ماحضرش، لكن راح ألمانيا يحضر افتتاح معرض (أنوجا).. وللأسف وزير الزراعة اللى بعده (المتهم): صلاح هلال.. يوم افتتاح المعرض وهوّ فى طريقه للحضور، حوّلوا موكبه لمجلس الوزرا بالقصر العينى كتّبوه استقالته، وبعد 300 متر قبضوا عليه فى التحرير.. ومنظمو المعرض مع العارضين الواقفين لاستقبال الوزير قفاهم كان بيأمر عيش، من الكسوف والإحراج أمام الأجانب والزوار.. والحكومة كلها فى الباى باى.. مفيش حد يحل محله حتى تانى أو تالت يوم، ياخد بخاطر العارضين.. ليه؟ هل لأن الفلاحة فعلاً حاجة عيب؟
الدليل:
1 - الدولة بكل مؤسساتها داخلة فى عمليات استيراد أكلنا وشربنا، بدل ما تدخل بالتوازى، بكل ثقلها، فى مساعدة الإنتاج والمنتجين!!
2 - إن الرئيس لما راح يفتح معرض، راح للبهوات المتنشين.. فهم عقول مصر.. ومصر محتاجة عقول، وطظ فى العضلات (فقد انتهى زمانها)!!! وراحت علينا يا فلاحين مصر!!».
وانتهت الرسالة بتوقيع: صلاح بسيونى - بنها - قليوبية
■ تعليقى فى كلمتين:
الشكر كل الشكر للإعلامى المحترم أسامة كمال.. لنجاحه فى ما فشلنا جميعاً فيه.. وهو: حضور رئيس الجمهورية افتتاح معرض، وبهذا أرسى قاعدة «أن الرئيس مُمكن يفتتح معرضاً»..
فإن لم يحضر الرئيس لافتتاح المعرض الزراعى المقبل، ساعتها من حقنا نقول ما نشااااء!!
إشمعنى يا ريس؟
ليست هناك تعليقات:
إرسال تعليق